ساعدوني

**masa** · 06-09-2006, 03:48 PM

هل من حق المديرة انها تجبرني على مسك النشاط؟؟؟؟؟؟؟؟؟؟؟؟؟؟؟

مع العلم اني العام كنت ماسكته وكرهت عمري

الله يسعدكم جابوني بسرعه عشان اعرف راسي من رجولي

ولكم مني اصدق الدعوات

**enigma** · 07-09-2006, 01:54 AM

اختي الكريمة

اعتقد كلنا عارفين انو ما في شي بالغصب في اسناد الأعمال للمعلمة.

يعني لو انت شايفة انك غير قادرة على اداء المهمة اللي اسندت اليك من حقك تعتذري بكل ادب و بأسلوب حلو.

لأنك لو رفضتي بطريقة حادة زي ما بنشوف و نسمع احيانآ راح ينعكس بالسلب عليك و على علاقتك بمديرتك.

بمعنى انو لو كانت المديرة انسانة ماتراعي ضميرهاو لا تخاف الله في شغلها راح تحول اليوم الدراسي الى جحيم لا يطاق و اهم شي بالنسبة لنا علشان نعرف ندّي الطالبات العلم اننا نكون في نفسية مرتاحة.

بكل ذوق كلميها و اعتذري عن العمل و حاولي تطلبي منها تسند لك شي تقدري انت تبدعي فيه اكثر ، و إذا اصرت على الشي نفسه اقبلي بشروط زي انو يكون معاك مساعدة و إنها تضمن لك إنو المعلمات يكونوا متعاونات اكثر( طبعآ هذا شي من رابع المستحيلات ).

انا سبق و مريت بنفس الموقف و عارفة و حاسة بالمشكلة اللي انت فيها لأن معظم المعلمات للأسف بيطلّعوا عيون مشرفة النشاط الين ما يسلموها الأعمال.

زي ما قلت خليك هادية في كلامك و لا تعصبي و إذا ما كان في مفر اقبلي بس بشروطك.

الله يوفقك و طمنينا ايش راح يصير معاك.

**masa** · 07-09-2006, 12:30 PM

استاذتي الفاضله

جزاك الله خير على ردك اللي يدل على سمو اخلاقك
والله كنت ناويه للمديرة على نيه يوم السبت بس ردك خلاني اراجع حساباتي
شكرا لك اختي
وجميل ان يضم المنتدى ناس مثلك

**عاشق ميقوع** · 07-09-2006, 03:57 PM

اذا انتي متعينه عند اهلك وبديرتك ارفضي النشاط لكن اذا تنتظرين حركة خارجية او داخليه وافقي على مسك حصة النشاط لان المديرة يمكن ماترفع باوراقك خاصة بطاقةحركة النقل اذا ماعندها ضمير وحاولي تقولين لها ابي امسك نشاط عشان ترفض طلبك يمكن الدعوه تسلط وكراهيه من قبل المديره لسمو شخصك

**enigma** · 07-09-2006, 06:26 PM

العفو حبيبتي

انا ما سويت شي و انا نقطة في بحر الرائعين اللي في المنتدى.

و انا بتصفح المواضيع لقيتك منزلة الموضوع مرة ثانية في الإستراحة و عرفت ان عدد حصصك قليل.

طبعآ هذا مو عذر انها تمسكك اعمال اضافية بس اكيد ما لقيت غيرك بهذا العدد القليل من الحصص و لا انا غلطانة.

و بعدين طالعي للموضوع انها اكيد متأملة فيك الخير و خصوصآ انك سبق و مسكت الشغل قبل كذا و كنت متمكنة منه.

يعني بلاش كلمة اشمعنى انا و غيري لأ.

الحقيقة و انا بشوف الردود لقيت في تركيز على موضوع انك تقبلي على مضض لو كنت طالبة نقل، و انا بصراحة ضد هذي النظرة.

يعني الواحد يصير طيب و ذوق بس لما يكون محتاج لشي معين و غير كذا يصير ............

ما اشوفها حلوة في حقنا كتربويين نتعامل بهذي الطريقة. خير الأمور الوسط يعني لا تكن لينآ فتعصر و لا قاسيآ فتكسر.

خليكي ذكية في تعاملك يوم ما ترخي هي شدي انت و يوم ما تشد هي ارخي و خليكي مرنة.لأن الدنيا تحتاج سياسة و في الأخير ما يبقى من الإنسان غير الذكرى الطيبة بعد ما يروح.

في كثير بياخذوا حقهم بالزعيق و قلة الأدب و يخلوا الناس ينفذوا اللي يبغوه عشان يتقوا شرهم بس النتيجة انو لا في احد بيجيب سيرتهم بالطيب و لا بيحترمهم.

صحيح في اوقات الصوت الواطي ما يجيب نتيجة مع البعض و نحتاج ساعتها لقليل من الحزم و الشدة بس صدقيني و عن تجربة لو عندك رصيد من الحب و الإحترام من قبل المديرة و المدرسات راح تتيسر كل امورك بإذن الله و تقدري ساعتها تسحبي من الرصيد وقت و زي ما تحبي.

انا مثلآ السنة الماضية ( و انا على فكرة بدرس جنب بيتي )طلبت مديرتي اني امسك اعمال المراقبة و اساعد مراقبتنا الين ما تجي واحدة ثانية تساعدها طبعآ خلصت السنة و ما جات الأخت المنتظرة بس و الله ما تتصوري قد ايه كان في تعاون لأقصى حد من الكل و خصوصآ اني بداوم في مدرسة ثانية.

سامحيني اني طولت عليكي ، و طمنيني ايش تطورات الموضوع يوم السبت.

**حمامة** · 08-09-2006, 12:59 AM

كلام إنيقما صحيح 100% ...

الرفق ما جاء في شئ إلا زانه ...

وإذا عدمت وأنا أختك فالإصرار على كلمة ( لا )

**masa** · 08-09-2006, 01:53 AM

عاشق ميقوع

يمكن ماترفع باوراقك خاصة بطاقةحركة النقل اذا ماعندها ضمير

ما اعتقد ان الموضوع يوصل الى هذا الحد خاصة بعد الانترنت

شكرا اخوي على رائك
وجزاك الله خير

Enigma

طبعآ هذا مو عذر انها تمسكك اعمال اضافية بس اكيد ما لقيت غيرك بهذا العدد القليل من الحصص و لا انا غلطانة.

المفروض نصابي 16 حصه بس من عندهم خفضولي .... اغراء

و بعدين طالعي للموضوع انها اكيد متأملة فيك الخير و خصوصآ انك سبق و مسكت الشغل قبل كذا و كنت متمكنة منه.

المديره جديده يعني لسه ما عرفت خيري من شري ...
بس سمعت اني كنت ماسكه النشاط العام والحمدلله الكل مدح في شغلي....مع اني كنت كارهته
والله كنت اقول ياربي متى تنتهي المدرسه بسبته... ما ابغى المعاناه تتكرر ها السنه كمان

في كثير بياخذوا حقهم بالزعيق و قلة الأدب و يخلوا الناس ينفذوا اللي يبغوه عشان يتقوا شرهم بس النتيجة انو لا في احد بيجيب سيرتهم بالطيب و لا بيحترمهم.

اللي صدمني انهم اخدوا اداء وظيفي اعلى مني بصراخهم........ عشان كده كنت افكر اصير زيهم خاصة ان المديره جديده

سامحيني اني طولت عليكي ، و طمنيني ايش تطورات الموضوع يوم السبت.

يا قلبي ....... انتي اللي سامحيني تعبتك معايا

وان شاء الله ينتهي الكابوس هذا على خير .....

والى ذلك الحين لك مني اصدق الدعوات

حمامة

تسلمي اختي على مشاركتي همي
وحياك الله