امثال حجازيه

**ابواصيل** · 02-10-2006, 05:40 PM

السلام عليكم ورحمة الله

هذا موضوع جاني عبر الإيميل واعجبني وحبيت اضعه لكم للفائده والثقافه
( اجل نحن الحجاز ونحن نجد)
(مكه خير) اطهر البقاع واقدسها
[frame="1 80"] أمثال حجازية :

إذا جيت رايح كتر من الفضايح.
او إذا جيت رايح كتر من الملايح

بعد ما أكل واتكا قال ريحته مستكا.

حاجه ما تهمك وصي عليها جوز أمك.

ست وجاريتين على قلي بيضتين.

أعمى ويلضم خرز.

دلع الكبار زي الشقدف على الحمار.

اللي ماله أم حاله يغم.

كنس بيتك ورشُه ما تدري مين يخشوا.

كل حبه مسوسه لها كيال أعور.

على قد زيتوا سرجلوا.

الخايبه تتعلق بالحبال الدايب.

عقربه في الغار ولا ضره في الدار.

خاتم بفصو وكل شي ترصوا.

أهري وانكتي يا جاره وأنا ثابته زي العماره.

شايل لنا طيران عبد القادر

لو لك شي عند الكلب قول له يا سيدي

لا تقرصيني يا نحله ما أبغالك عسل..

يحسدوا الفقير على موتت الجمعه

سكتنا له دخل بحمارووو

ما يقدروا على الحمار يقدروا على البردعة

اذا حلقوا لغيرك بل راسك واستنى

ايش عرف الحمير بأكل الجنزبيل

البيض الفاسد يدحرج على بعضه

حاجة ما تهمك وصي عليها جوز امك

ست و جاريتين على قلي بيضتين

اذا تعاندوا الحمير يا بخت الركاب

البيضه ما تخابط حجر

حبيبك يمضغ لك الزلط وعدوك يعد لك الغلط

حمارتك العرجة تغنيك عن سؤال اللئيم

داخل لبيت العروسه نادر من بيت العريس

ياريتني بيضه وعرجه اصلوا البياض فرجه(بضم الفا).

يااخد القرد بماله يروح المال ويبقا القرد على حالو

الله من محبته في عبيدو جعل العمر والرزق بيدو.

اللي يشوفني بعين اشوفوا باتنين.

اللي ماله ام حاله يغم.

كنس بيتك ورشه ماتدري مين يخشوا.

كل حبه مسوسه لها كيال اعور

مين يشوفك يالي في الضلام تغمز

على قد زيتوا سرجلوا

ماتعرف خيري لين ماتجرب غيري

عقربة في الغار ولا ضُرة في الدار

فقير اتجوز فقيرة خلفوا وجع القلب

كبيرهم فلفل وصغيرهم زنجبيل واللي في الكوفلة يقول من العايدين

خاتم بفصو وكل شيء ترصوا

خشوني لاتنسوني ولعوا الشمعة وشوفوني

عمية تحفف مجنونة وتقولها حواجبك سودا ومقرونة

الصرمة والقبقاب صاروا أصحاب

يا داق الموية في المهراس يا مربي وليد الناس

كل عيش البخيل ولا تأكل عيش المنان

أدب ولدك وان زعلت امه

يابخت من بكاني وبكى الناس عليه ولا من ضحكني وضحك الناس عليه.

رضينا بالهم والهم ما رضي بينا

اتملت العدوة وقلت المروه

أكلوا الملوخية وصاروا أفندية

لمن كنا ما كانوا ولمن رقدنا قاموا

قالوا متى طلعت القصر قالوا أمس العصر

العروسه للعريس والجري للمتاعيس

سلامتك والهيل والقرنفل قمامتك

اللي يشيل قربه مخروقه تنقط على راسه

الحجر من الارض والدم من راسك

أخوانك من أمك زي الدهب في كمك و أخوانك من أبوك زي القوم لما ينهبوك

من بيت أصقع لبيت أرقع

مطبق العاده و معصوب كل يوم
ههههههههههههههههههههههههه

في كل محضر بالتوب الاخضر

باب المجلس يقول باب السطوح .. اللي يجي يجي .. واللي يروح يروح

خليها في القلب تجرح و لاتخرج بره ترمح

الحر من غمزة والحمار من رفزه
يضرب هذا المثل لايضاح الفرق بين النبيه والبليد.

حمار الحكومة حكومة
يضرب هذا المثل للموظف الصغير المتسلط على الناس

خطبوها اتعززت تركوها اتندمت
يضرب لمن يتظاهر بعدم الرغبة حينما يعرض عليه امر ولكنه يندم بعد فوات الاوان

دلع الكبار زي الشقدف على الحمار
يضرب هذا المثل لخروج العجوز عن وقاره وجديته

والشقدف عشان الاسئلة بس:ما كان يوضع على الجمل ليجلس فيه المسافرون

كل حبه مسوسه لها كيال اعور

قلبي على ولدي انفطر وقلب ولدي عليا حجر.

و لا تنسوا ارضى بقردك لايجيك اللي أقرد منوو

الحب عياقة ...توب بلا ياقة

الالقااااااااااااااب :
عندنا في الحجاز وخصوصا مكه في اسماء يعطوها كنيه او لقب على سبيل المثال واحد اسمو عبد الله يقولولو أبو عابد ... وهذي بعضها :

عمر : أبوسراج
حسن : أبو على
حسين : أبو هلال
يوسف : أبو يعقوب
عبدالله : عبادي او ابو عابد
عبدالرحمن : الوجيه
عبد الرحيم : أبو رحمه
فيصل : أبو عبدالله
عبد العزيز : عزيز أو ابوسعود
فاطمة : فتو
مريم : منّة
ابراهيم : أبو خليل

كمان الحجازيين فيهم اخلاق و احترام مافي بعدها

لما يطلب منك سكينه ايش يقول ؟

يقولك الله يخليك اديني سكينة في قلب العدو

لما يقلك كنت ب أكل

يقلك كنت ب أتعشى مثلاً فضله خيرك

اشياء و تراجمها :

بيت الما: وهو ما يعرف حاليا (بدورة المياه) وقد سماه الجيل الصاعد المكاوي الآن (الطهارة) وقد ورد انه تم التسمية هذه على أساس انه مكان كبير في البيت يوجد فيه الماء فسمي بـ بيت الما.

المركّب: بتشديد الكاف، وهو ما يسميه جميع الناس الآن (المطبخ) والى الآن يعتبر علماء اللغة العربية هذه التسمية من عجائب التسميات لأنه لا يوجد سبب معروف للتسميه هذه إلى الآن!!!!

الدقيسي: بتشديد الدال وكسرها وكسر السين، وهو ما يعرف بالمستودع ، يقول الكاتب المكاوي (محمد يواد فلاته) أن التسمية تعود إلى الحرب العالمية الأولى حيث استخدم أول مره كمخزن للذخائر وسمي في مكة بالدقيسي ، وقد قام جيل 2000 من شباب وشابات مكة بتسميته بالمخزن بدافع التطور.

القرندي: بفتح القاف والراء وتسكين النون وكسر الدال <<<مشوار ها؟
وهذا نوع من أنواع مداعبة الأب المكاوي لابنه فعندما يناديه ويتأخر 3 ثواني يقله (بسرعة عساك القرندي)
ويفسر علماء الجن أن القرندي نوع من أنواع الجن وببساطه يدعي الأب على ابنه بالقرندي <<شفتو اللطافه.

الفقده:مفعول عشانه من فعل يفقد، وهذا نوع آخر من أنواع المداعبة وهي الخاصة بالأم المكاويه.
حيث تداعب أولادها بـ (تعال الله يفقدك)

توتوا: وهو نوع من أنواع المعادن المكتشفة في الاوديه المكاويه. ويستخدمونها المكاوية في تصنيع نوعين من الأشياء اللي تنحط فيها مويه للشرب وهو ما يسمونها زينا (الكاسه) ومو زينا (المغراف).

المغراف:هو نوع من أنواع الكاسات التوتوا ، في حين انه تمت إضافة معلومة من علماء الجن المذكورين سابقا
انه في مرة من المرات قامت أم تداعب ولدها لصغير (الشقي) اللي يلعب يالمغراف وقالتله الله يفقدك بس
وبعدين قالت خلاص يامغراف خده وفي لمح البصر اختفى الولد ، والمغراف هو نوع من أ نواع الجن
وكان بالصدفة متواجد في مكة هذا الجني ههههههههههههههههههههه

على طبطابي .. : يعني على مزاجي :cool:

مِرَسْتَكَه ..: يعني متأنتكه يعني مرة شياكة .. ومرتبّة

وايق : .... يعني طالع .... يعني مثلاً تقول .. : ( ياواد وايق زي الناس لا اهبدك باتقل شي قدامي ..

و لا أهبدك اللين أجدد ايمانك

تزل ... : يعني تمر

مرحبمبك ... : يعني مرحبا بك .. بس باختصار شوية :D

باطِرمَة ... : يعني جلسة ... كنب حاجة زي كده ...

كَرَاوِيتَه : ... حاجة خشب كده ... يحطوا عليها الباطرمة ....

مَدَارِيْه : ...... مراجيح ... :D

ندرت عينك من حُقّها ... : يعني خرجت عينك من محلها .... كده ::]

شَلْمَه ...: يعني فجعه .. يعني مثلاً تقول ( اشبك ياواد مشلوم كده عالاكل ؟؟ ) .. ::]

قيّسْتَك : ... يعني حسّبتك .... توقعتك .... هقيتك

يعني مثلاً .. ( قيستك ياواد حتزل على عمتك فتّو ) ... وه ياستيته .. :D

بُخْنُق ... : اللي يتلبس في الراس ويكون مخيّط على قده .... :SMIL:

مِدَهْمَلْ : .... يعني مبهدل .... يعني مثلاً ( اشبك ياواد مدهمل كده .. لاتكون كنت بتلعب في المداريه ) ؟؟ :-@

دهليز : يعني سيب (... سيب وانا اسيب :D )..... يعني محل كده زي اللي يكون قدام ابواب العماير

من جوّه .... :SMIL:

زنبيل : ... يعني كيس ... :cool:

زلطة : .... سَلطة بعد التعديل ... |324|

يدعك : ... يعني يفرك ... يعني مثلا .. ( ايش بتسوي يابت :-@ ... بادعك الاسورة :D .. روحي يابت عساكي بداعوك يدعك مصارين شيطانك غسلي الصحون بدل مانتي قاعدتلي كده لاشغله ولا مشغله
... :-@ )

مجغجغ : مليان مويه

لعيونكم كمان محادثه مكاويه :

ماجد ابو صدقه / يواد يامعمر
عمر ابو سراج / هلا مجود
ماجد ابو صدقه / كيف الحال والتحوال
عمر ابو سراج / خليها على ربك ياشيخ
ماجد ابو صدقه / بلا في شكلك ... خاربها من بدري ... اشبك
عمر ابو سراج / لا بس البزوره جابولي القلق
ماجد ابو صدقه / صفقهم احسن لك
عمر ابو سراج / يابن الحلال الحرمه دي زي المرض قاعدتلي
ماجد ابو صدقه / من جد ... المهم رايح القهوة
عمر ابو سراج / قدام ... والله مره المنجا عندي يبغالها ترويق
ماجد ابو صدقه / هه مايبغالك الا باعشن
عمر ابو سراج / من جد ... سرينا
ماجد ابو صدقه / خلاص بعد نص ساعه امرك
عمر ابو سراج / هيا لا تتاخر ... تراها واصله معايا
ماجد ابو صدقه / بس تره مفلس
عمر ابو سراج / لا تشيل هم .. انا منقرش
ماجد ابو صدقه / الله عليك ياعمده .. او كي يالله القاك هناك
عمر ابو سراج / على خير

هذا اللي عندي بصراحه واتمنى ان الموضوع يكون عجبكم

واي واحد عنده اضافات أتمنى انو ما يبخل علينا والله يعطيكم العافيه

احيانا والله اعلم يقولو السمك عرّق!!!!!!!!!!!!!!!!!!!!!!!!!! !!!!!!!!!
يعني نزله عرق
ليه ياربي؟؟
وهذا يدل على سوء القلي

و في النهايه أقول أهل مــــــــــــــــــــــــ ـــكـــــــــــــــــــــ ــــــــة حمام [/frame]

الى اللقاء مع اللهجه الحجازيه
:36_4_12:

**المحيط الهادي** · 02-10-2006, 06:21 PM

يااخد القرد بماله يروح المال ويبقا القرد على حالو

ههههههههههه ضحكني كثير هدا المتل ههههههه

أش القصة أبو أصيل اللهجة والأمثال كلها حجازية الحلقة الجاية نجدية ولا شرقية ولا شمالية ههههههههه

تشكراااااات أبو أصيل

**sokara** · 02-10-2006, 09:55 PM

والله موضوع مرستك ومتكتك زي صاحبو يا أبو أصيل

وعجبني مووووووووووووووووووت

تشكراتنا
ربنا يحفظك ويحميك

**!!عليان ريري!!** · 02-10-2006, 11:02 PM

أبو أصيل

يسلموووووو على الامثال

عليان ريري

**dodemargo** · 03-10-2006, 05:46 AM

[grade="8B0000 FF6347 008000 4B0082"]الله يسعد قلبك
الجميل منك أبو أصيل تعطي الكلمه وتعلق عليها والله الشي هذا يموت ضحك
تسلم يالغالي وأهل الحجاز ونجد والشمال والجنوووب وكل المملكه العربيه السعودية عشان محد يزعل علينا

ودمـــــــــــتم على خير [/grade]

**English Addict** · 03-10-2006, 03:15 PM

والله ضحكت الين مادخت

يسلمووووووووووووووووووووو ووا

**~ | c h a r i s m a** · 03-10-2006, 10:51 PM

الاخ ابو اصيل

موضوع رائع وانا احب

الحجاز وكلام الحجازيين مره

يعطيك العافيه

والله يهدي الجميع

لك كل تقدير

**Meant To be** · 03-10-2006, 11:55 PM

هلا والله بأهل الحجاز وبالأمثال العسل

يعني انا من الحجاز في بعضها اعرفها والبعض لا

ما قصرت اخوي ابو اصيل على الموضوع الرائع

يعطيك العافية

**أسومة2** · 04-10-2006, 12:46 AM

يعطيك العافية

**nofa** · 04-10-2006, 05:05 AM

يااااااااااااا الله فكرتني بكلام عمتي الله يحفظها
الله يسعدك ويسعد اهل الحجااااااااز ومكة وكل المناطق يا رب
يعطيك العافية ربي
اما مكة من جد خيييييييير وغييييييير في لهجتها ***امدح فيها عشان انا منهاههههههههههههه
تسلم يدك ابو اصيل على الموضوع الجنان

**Scream of Pain** · 04-10-2006, 05:54 AM

تسلم أخوي ويسلمو أهل الحجاز كلهم وأهل نجد كمانه عشان ما يزعلومنا تسلم المملكة العربية السعودية وكل أراضيها .

ولو سمحت اخوي كتر من الأشياء هااااااااادي ودمت.......