مغامرات ولد خالي يوم انه في ثاني باء

**Old Member** · 15-04-2008, 02:32 AM

السلام عليكم ورحمة الله ..

ترا هاذي القصه حقت بنت خالي هي المؤلفتها ..

يعني القصه تتكلم عنها وعن احوها الي هو ولد خالي ..

----

كلن منا عندة اخو صغير وطبعا معروف عنهم البراءة اللي بعض الاحيان تقطع المصارين من الضحك ...

بس اخوي (الله يعيذنا منه) مافيه ذا البراءة مستقبله يعني عربجي .... والله مشكله عويصه ...

عجزوا اهلي يفكونها والمشكله انه بدى يأثر علي بالعربجه....

تصدقون اني اتصارع معه ...

وهو ابو 8 سنين وانا 19 والله عيب حتى مرات يطيح علينا ابوي ويجلدني الين يغني بطني ..

(ابوي يحسبني اكفخ اخوي) ...

وعلى ها الحاله ..

واذا ماتصارعت معه لازم اعرف اني بنام بعين مفقوعه وخشتن مايله وخشمن يخر دم ومجرى الدمع مسدود من كثر الطق مااقدر اعبر عن مشاعري واصيح ...

المهم هذا اخوي الله يصلحة مهبل بمدرسينه واصدقاه والمشكله شاطر ( والله ماتركب ) ...

ياخذ الاول بسم الله عليه وكلن يحبه على انه غثيث واذا اقبل وانا قاعده لازم كف على الاقل(يعني يمزح هو وخشته)صار وجهي كنه تشليح من كثر الطق ...

عاد انا بسرد لكم بعض من مغامراته وخصوصا في فصله ثاني(باء)...

ابنزل نفسي له وتحمل التكفيخ بس عشان اوريه واخليه يقرى الموضوع على النت
وينقهررر ...

اولا ...

ابعطيكم نبذه عن اخوي ...

عمرة 8سنوات الله لا يعقله ..

ووزنه 20كيلو<< بالله هذا وزن واحد في ثاني ابتودائي ...

وطوله متر وعشرة <<< طويل ماعليه ...

اسيمر واشهب وركبه سود واظافره فيها وصخ ونعلته مقاس 6 سنين ...

الكعب يطلع برا وما غيرها من عمرة 6 سنوات اول ما بدته العربجه ...

ومملوح والله ماعليه تف تف تف على اخوي ..

يتغذى قبل على المكسرات والحب (فصفص يعني)والاندومي عشقه ...

مايتروش الين تعطيه عشرة ريال ..

يحب بنت خالي اللي اصغر منه بسنه <<< وش دخلها ...

(من يعثر عليه فاليسلمه الى الجهات المختصه ولكم جزيل الشكر) ..

هواياته : -

قتل الحشرات هوايته الاولى ...

المصارعه ويحب كين (وانا اللي آكلها ماغير يطبق حركات كين علي) ...

هوايته الثالثه تكفيخي ...

والرابعه السوني ويلعب بشريط دبليو دبليو اف القديم حق سوني ون ...

الجزء الاول ..

العنوان : -

°·.¸.•°°·.¸¸.•(((يمه ليه مابعد متي))) °°·.¸¸.•°°·.¸.•°

مرة في يوم من الايام الجميله توني قايمتن الصبح على اني ابزين الفطور مع امي
اثري نزلت لصالتنا(احلفي) ...

المهم لقيت الوالدة ضايقن صدرها ولابدت في الفطور
وحطزت جنبها(يعني جلست بالقرب منها)وقلت لها عشى ماسر ياميمتي ...

وراتس ضايقن صدرتس ومحتاسه والخشه مبنشره تبين نسوي لتس البنشر ....عاد
انا ابيها تضحك مادريت الا وخشتي واصلتن آخر صالتنا اثر الوالدة عطتني كف ..

عاد انا حسبتها تعاني يعني ضفي وجهتس وزيني الفطور بس...عاد انا على نياتي ..المهم زينت الفطور وهمدناه(يعني زرطناه)..وعدت التجربه احاول في امي تطلع مافي خوالجها من همومن واحزان المهم بادرتي بها السوعال: (سوير بنيتي (عاد انا فقيت خشتي ))قلت: (هلا يمه)قالت: (انا عجوز؟) ....

الصراحة الوالده شوي كبيرة في السن الله يخليها لنا ويطول في عمرها عاد انا ابعطيها دافع(لا يمه منتيب تسبيرة وراه)قالت وهي فاقتن خشتها من الفرحه: (صدز وانا امتس)قلت : (ايه اجل وش نانسي عجرم عندتس بس )<<<<ياشين التسذب ...

المهم قالت لي : (اجل ابعلمتس وراي ضايقن خلقي اليوم)قلت لها : (يالله كلي آذانون صاغيه هذذي علي يمه(يعني فضفضي علي)...

اثر السالفه وما فيها انها قاعدتن تسولف مع ذا العربجي الصغير(عاصم)وهو يسألها عن عمرها : (يمه كم عمرتس انتي الحين)قالت امي وبكل براءه: (عمري (..) ياوليدي وراه)قال: (ولا بعد متي وش تحترين) ...

بسم الله على امي الله يخليها لنا ذخر وجع يوجعه ...

وتقوم الوالده تنعى(يعني تصيح بحرقه) وذاك وبكل بروده راح يتمشى بسيكله ابو ثلاث كفرات في الحوش ....

واجيك عاد انا واهون على امي واقولها ماعنده سالفه بزر لا تاخذين بكلامه ...

وواجيك عاد انا ابجيبه يتاسف ويحب راس امي وامسكه هو وسيكله يوم قال: (خير نعم وش تبين )قلت: (وش ذا الحتسي اللي انت قايله لامي مهوب عيبن عليك..

قال: (وش انا قايل )قلت: (والله مدري انت داري وش انا اقصد لا تخيبل) ...

يوم قال: (اييييييييييييييه تقصدين يوم اقولها ورى ما بعد متتي لها الحين) ..

قلت : (وبعد تقولها مرة ثانيه)...

قال : (وانا صادصز وراها ما ماتت لها الحين وش تحتري )عاد انا مدري وشلون جتني الجراء وعطيته كف (ياليتني ما عطيته) ...

تدرون وش صار

مسكت سيكله ابو ثلاث كفرات واجدعه ياولد علي الا يوم صكني مع جبهتي واغمى علي مادريت الا وانا في المستشفى وفلبنيتن تويق(يعني تطل) في خشتي ...

قلت : ايس فيه (عشان تفهم) .. قالت: (هزا فيه مستشبى) قلت : (ليه؟) قالت: (هزا فيه جره كبير في هاجب هق انتي) ...
والمس حاجبي الا فيه لزقتن كبر صحن الكبسه قلت: (عمى كل ذي لزقه) مادريت الا وابوي داخلن علي ومعه ذا الحمار (عاصم) ومدنق (اول مره اشوفه مدنق)(مدنق:يعني موطي راسه) ...

ويجي ويحب راسي ابوي ويقول لاباس طهور وعاد انا مجمعه الصوقه وهوش على عويصم ويسكتني ابوي ويقول ما عليتس جاه حقه وزود يوم رجعت للبيت اثر الوالد مقطعن عليه العقال ومخليه يتأسف من امي وعاد انا اقوله بتهزي: (ورني ظهرك؟) ..

قال: (انطمي لا الحقتس الحاجب الثاني ) وو الله انطم وقررت ما عاد اعطيه كف عقبها
المفروض اني ما تليقفت ورزيت خشتي اذا صار هو في الموضوع المفروض اطلع منها واخلي الجهات الامنيه تهتم في ها الموضوع بس الشكوى لله ....

النهاية ..

لو اعجبتكم اسدح لكم اجزاء اخرى

خخخخخخخخخخخخخ

ملتوووووووووووش