enter & see

**لينا عبدالله** · 20-03-2009, 07:50 AM

[لسلام عليكم ورحمة الله [/
سؤال لجميع المبدعين والمبدعات بسعودي انجلش يريت تعطونا فكرة عن كيفية استغلاكم للحصص الانجلش يعني من الدقيقة الاولى بالحصة الى اخر دقيقة ,هل بكل حصة تعطونهم املاء؟ هل تقيمون الطالبات بنفس الحصة ؟؟وش افضل طريقة استخدمتيها بالشرح وجذبت الطالبات وكانت مية مية؟انا عن نفسي ادرس بقرية عدد طالبتها قليل لكن تضيع الحصة لوجود طالبات لايفقهون شيئا بالمادة يعني وحتى حنا صرنا بالترم الثاني الا انهم مايعرفو يكتبو الحروف بشكل صحيح في الدفتر ومع ذلك مذاكرة بالبيت مايذاكرون حاولت بجميع الطرق اني ارفع مستواهم لكن التحسن بطئ جدا صرراحة احيانا احس باحباط واحس اني ظلمت الشاطرات بتضيع نصف الحصة مع طالبات مهملات بامكانهم يطورون انفسهم بانفسهم لكن الكسل ومادراك مالكسل؟ ع العموم احس اني طولت الهرج ...
الزبدة يريت نلقى بالموضوع تفاعل علشان نستفيد وشكر-

**bigevil** · 20-03-2009, 10:01 AM

الله يكون فى عونك .. فى القريه يعني بدو .. والبدو مافى امل يتعلمون القراءن فما بالك باللغه الانجليزيه ..

انا الحمد لله تعينت فى مدينه الدمام فى وسط المدينه .. وربي رحمني من القرى والا كان جاتنى جلطه ..
على العموم ...
حاولى انك ما تضيعين الحصه بمجرد دخولك .. تبدين فى الدرس ... واعطي الحصه .. وطبعا دروس سادس حدها 20 دقيقه كافيه .. وبعدها طيحي فيهم اسأله واجوبه .. وطلعيهم عند السبوره .. وكل حصه ركزي على مجموعه .. مو لازم كل الطالبات .. يعني تقومين الممتازات فى اول 10 دقايق بعد ما تنتهين .. وبعدها حطي فى راسك ..5 طالبات بس .. وحاولى تركزين عليهم .. وخليهم يقرأون ويطلعون على السبوره ... وبهذليهم يرددون ... والحصه اللى بعدها شوفيلك 5 غيرهم .. حتى ما تضيعين الحصه على عدد كبير ولا يستفيد احد .. وخليها برمجه .. كل حصه حطى فى راسك مجموعه وبهذليها .. وهم مع الوقت راح يستفيدون ولو شي بسيط ... واهريهم واجبات .. واكثرى من النسخ .. جمله اكتبيها وخليهم ينسخونها مثلا عشرين مره ... والمنتدى هنا مليان اوراق عمل خذي وصوري واعطيهم .... .
سويلهم يوم اختبار .. وخليه صعب مره .. وخلي معظمهم ياخذ اصفار .. وبعدين تعالى سويلهم حفله .. وهزئيهم على المستوى السيء حتى الممتازات عندك .... وبعدين سوي نفسك رحمتيهم .. وقولى يلا بعيد الاختبار .. وسويلهم اختبار سهل .. وراح يجاوبون .. وبعدين قولى .. اذا شاركتم معي راح اخلى كل الاختبارات بسيطه .. والا ترا بجيبها صعبه وكلكم ترسبون .........

جربي ذي الطريقه .. واذا ما نفعت تعالى اشوفلك طريقه ثانيه

**talal_2888** · 20-03-2009, 03:02 PM

بصراحة انا اتفق مع صديقي bigevil في كل ما قاله

صحيح حصص الصف السادس 20 دقيقة تكفي الدرس والباقي زي ما قال اشغليهم بالكتابة على السبورة او تسميع الكلمات ...

بصراحة انا أبدا بالشرح وبعد الشرح اعطيهم الكلمات المطلوبة حفظها ولما اخلص شرح اقول لهم اكتبو الكلمات على الدفتر

وبعدها افتحوا كتاب work book ويله نحل الاسئلة مع بعض

وفعلا طلاب الدمام والخبر والقطيف كلهم شطار .... يعني انا بالقطيف والله العظيم ما احتاج اني اعلمهم كلهم الي ابوه بأرامكوا والي امه معلمة انجليزي والي عاد مرة وحدة ..... تدرسه مدرسة في البيت ....

اما المدرسة الي اكمل فيها ...... العكس تماما ..... والله العكس تماما ..... لا ابو في ارامكوا ولا ام مهتمه في عيالها ولا احد يم اللغة الانجليزية ....

والله يعين

والله يوفقك

**لينا عبدالله** · 20-03-2009, 08:20 PM

للاسف الشديد عندي بعض الطالبات عندهم اشتراك وعضوية ذهبية في البلادة والكسل ـوالله يجي منهم لو انهم يذاكرون لكن ظروفهم وكثرة غيابهم اثرت بعد ع مستواهم لدرجة لو قلتلهم عندك ورقة عمل في الدرس الفلاني الاقي هالمجموعة غايبين ع الاغلب -وعلى قولتكم انا مكملة جدولي بمواد دين والله العظيم قران مايعرفون يقراءون بعدين تجي هالموجهه وتكب مافي جعبتها من انتقادات وتمشي والله حاله؟؟واتمنى من big evil انك تنزلي نماذج من اختباراتك لعل وعسى نلقى الفائدة المرجوة
وشكرا لمروركم واتمنى الاقي تفاعل من البقية

**من بين الناس** · 20-03-2009, 09:30 PM

السلام عليكم
اولا الله يعطيكم العافية جميعا
ثانيا...انا افهم مشكلتك اخت لينا لأن الحال من بعضه...بعض الزميلات يقولوا هم كسلانين باللغة العربية..نسألهم بالعربي وما يجاوبوا ...اجل كيف بالأنجليزي
رغم اني حاولت وحاولت ومازلت احاول واللي مساعدني قلة عدد الطالبات...بس يعني لو تعرفو اني انا طالبات سادس عمرهم اكبر من المتوسط يعني كبيرات بقوووة
20 وما دون....يعني والله ارفق بحالهم ,,بس مالهم حل...
بس بقول شغلة...فكري الطالبة الكسلانة ايش تقول لنفسها؟؟؟ حاولي تستشعري احساسها وانتي تتكلمي وهي تحس انها مو بالبلد ابددددددددددددددددددددددد دددد
هل تعتقدي لو اشتغلتي معاها على الأساسيات بمعدل حرفين كل يوم تكتبه وتجيبه ثاني يوم مو ثاني حصه كذا في ظرف اسبوعين بإذن الله نتمنى تكون اتقنت الحروف ..انا اعرف انك راح تتعبي لكن (( وما نطعمكم إلا لوجه الله )) خلي هذا المحرك الأساسي لك مو المشرفة ولا غيره..واستخدمي كل الطرق المشروعة والغير مشروعة
يعني انا البنت الكسلانة إذا صار وقالت اجابه شبه صحيحة اثني عليها واقولها هاه شفتي كيف بس ركزتي معايا شي شفتي كيف سهل... وبعدين بصراحة اؤمن بالقدرات يعني ...اسأل الكسلانة سؤال سهل...او اعطيها خيارات او اسمح لها تستعين بصديق..ومرة سوتها وحدة واستعانت باللي اكسل منها ..تخيلو انا انواااااااااااااااااااااع الجلطاااااااااااات بس برضو..طولي بالك والله يسعدك وصدقيني احتسبي عند الله
في حاجة اخيرة.... على إعتبار ان درجة تلقي المعلومة او المهارة هي اربع درجات... صنفي كل طالبة على هالأساس
ونفس الشي درجة استرجاع المعلومة وحطيلها اربع درجات
يعني فلااااانة شاطرة درجة تلقي المعلومة 1 درجة استرجاع المعلومة 1-2
الطالبة الكسلانة.. درجة تلقي المعلومة من 3-4 درجة استرجاع المعلومة 3
بهالطريقة تقدري تحددي مستويات تتعاملي معاها في الفصل
كمان فعلي الشرح بشكل حركي من قبل الكسلانات يعني لو تقوم الطالبة وتمسك الفلاش كارد..او تختار بطاقة دايم شغليهم...اضافة اخيرة اجعلي الفصل مجموعات اذا اعداد قليلة ممكن يصيرو اثنبن او اكثر المهم..خلي شاطرة مع كسلانة وجعلي القيادة في يد الشاطرة ..واذا شفتي تحسن قولي اليوم نخلي فلانة هي القائدة لهالمجموعة
الله يعطيكم العافية جميع

**لينا عبدالله** · 21-03-2009, 01:27 AM

من بين كل الناس ياشيخة روحي الله يجبر بخاطرك انتي ومن تفاعل معي بمشكلتي هونتوها علي الله يفتحها بوشكم يارب

[ننتظر البقية)

**لينا عبدالله** · 21-03-2009, 08:50 PM

only 3 comments
I WAS HOPING ALOT OF COMMENTS.
SEE YA

**Nn2** · 22-03-2009, 10:58 AM

السلام عليكم ورحمة الله وبركاته .. أنا مثلكم أعاني عندي طالب لا يعترف بأوراااااااااااق العمل لا يحب الكتابة و طول الوقت سرحاااااان مع إن الفصل كله كخلية نحل مجموعات و أوراق عمل ثم فلاشات و أناشيد و ألعااب و الله صرت أفكر بالاستقالة لأني شعرت بفشلي معه لا أعتقد بأن من الصواب أن أكمل و آخذ ذنبهم .. المصيبة إني استدعيت ولي أمره من بداية العام و لم أجد تحسن و طلع الباشا صديق المرشد اللي كرمه نهاية الفصل الأول لأنه أب مثااااااااااااااااااااالي أين المثالية و الطالب يشتكي منه 5 معلمين ؟؟؟؟؟

**أماسي** · 23-03-2009, 10:50 PM

آذآ هم يستخدمون آلكمبيوتر

آعطيهم سي دي منسوخ فيهآ برآمج آثرآئية و تعليمية شي غريب وبيشدهم

غيري بآلآسلوب مرة مثلآ آطلعوآ خوذوآ آلدرس برآ بآلسآحو و قولي آذآ صرتوآ ممتآزين كل مرة بنطلع

خلي دروسك عملي آكثر

جيبي وليآت آلآمر وخليهآ تحضر لك درس تشوف بعينهآ مستوى بنتهآ ممكن بدون مآ تدري آلبنت

شجعيهم ب( جوآئز - خوذيهن لمكتب آلمديرة وخليهآ توقع على آلملف - عديهم بآلطآبور)

جزآك آلله خير

**hossen** · 24-03-2009, 09:56 PM

ياختي تقول لك قريه تقولين كمبيوتر انا اقول ليش مانستخدم اسلوب تعليمي جديد

**إحساسي شمالية** · 24-03-2009, 11:28 PM

السلام عليكم

أنا مثلكم ادرس بقرى من تعييني قبل خمس سنين إلى هاللحظة ... وقبل اتكلم عن طريقتي مع البنات عندي تعليق على كلامكم عن طالبات وطلاب القرى ليش بدو و مافيهم أمل يفهمون وهالكلام ...والله طالبات القرى مواد خام وعقولهم صافية أكثر من بنات المدن وتقدرين تشكلينهم على كيفك وصراحه هم اللي يظهرون المعلم الجيد من اللي اي كلام ... و حتى هم مظلومين لا أهل مهتمين و لا متابعة ولا يحزنون .. عموما هم يبون جهد مضاعف شوي وإلا مايبين مجهودك معهم عاجلا أو آجلا ... و أفضل طريقة هي التشجيع بكل وسيلة ممكنة .. بالكلام بالهدايا بالتكريم أمام الطالبات ... أنا اروح بداية كل ترم لابو ريالين وأملّي السلة هدايا و بعد كل كويز اعطي المتفوقات هدايا بسيطة صدقوني مو مهم عندهم قيمة الهدية قد ماهو مهم افتخار الطالبة امام زميلاتها بتفوقها ...

بالنسبة للحصة داااايما ابدأها بكويز عن الدرس السابق اكون طبعا بلغتهم عنه الخصه السابقة وبعدين اعطيهم درجاتهم بالكويز اللي راح وامدح الممتازات وممكن اكرمهم واعطي المتأخرات كم كلمة ونظرة ... وبعدين اراجع الدرس اللي راح وابدا بالدرس ... طبعا البنات عندي يتعبون من كثر الكويزات بس بالأخير يتعودون ويصير شي روتيني ... و طبعا الكويزات غالبا صعبة ... بس لما يجي امتحان التقويم (المهارات) يكون الاختبار بسيط والاغلبية تاخذ واحد وهم هاضمين المنهج ..
وحاولي تغيرين جو الصف مرة طلعيهم برا للساحه العبي معهم ومره وزعي عليهم عصير وحلا بداية الحصة وشاركيهم الأكل وسولفوا شوي وبعدين ابدوا الدرس او المراجعه ...
طبعا لابد ماتطلع لك وحده ولا ثنتين يشيبون براسك طبعا مو قلة ذكاء بس لامباااالاة بس اللي انصح فيه الصبر ثم الصبر وطولت الباااال ... اعطيهم كويزات خاصة واعملي لهم دفاتر نسخ خاصة بهم وخليهم يعيدون لين يزهقون .. وخلي الشاطرات يساعدون الكسلانات واوعديهم بجوائز ...

وآخر السنة اكرمهم تكريم جاااامد امام الطوابير وهدايا قيمة ...

ودمتم سالمين

**ابو تركي2007** · 25-03-2009, 01:30 AM

السلام عليكم ورحمة الله وبركاته
اذا محتاره بمسألة الحروف مع طالباتك اهم حاجه
ارسمي اربع خطوط fure lines
جزئي السبوره الى ثلاث اجزاء
الجزء الاول , الحروف السبع العليا وهي b.d.h.t.k.l.f
الجزء الثاني , الحروف الوسطى وعددها 14 حرف a.s.z.x.c.v.n.m.w.r.u.i.o.e
الجزء الثالث , الحروف السفلى وعددها 5 حروف y,p,q,j,g

اتمنى اني قدمت الشئ المفيد لكم وآمل من الله عز وجل ان نعين بعضنا البعض لما هو في صالح مادة اللغة الانجليزية

**لينا عبدالله** · 25-03-2009, 04:14 PM

السلام عليكم ورحمة الله

اشكر جميع من تفاعل معي ومثل هالموضوع ترى فائدته للكل ونفيد ونستفيد

ومعليش عندي تعليق للاخت (احساسي شمالية) ماكان هناك اي استخفاف باي شريحة من المجتمع يعني لما اقول انا ادرس بقرية فاسلوبي معهم راح يختلف لان يبيلهن اهتمام من نوع خاص لان ظروفهم تختلف اختلاف كلي فيما لو كنت ادرس بمدينة لانو في المدينة اهتمام الاهالي لا يقارن ابدا باهالي البنات بالقريةكذا مرة اكتب بدفتر الواجبات تبع الكسلانات ملاحظات كذا مرة ارسل استدعاء لام الطالبة لكن لاحياة لمن تنادي ي عني كان غرضي بالسؤال استفيد من خبرات لعلها بعد الله تعيني لرفع مستواهن وعسى الله يفتح عليهن